सम्पादक बोहरामाथि आक्रमण, पत्रकार महासङ्घको भर्त्सना

काठमाडौं, २२ माघ । पालिकासमय डटकमका सम्पादक कमलबहादुर बोहरामाथि अज्ञात व्यक्तिबाट आक्रमण भएको छ ।

सो घटना प्रति नेपाल पत्रकार महासङ्घको ध्यानाकर्षण भएको महासचिव रामप्रसाद दाहालले जनाएका छन् ।

‘यही माघ २१ गते सोमबार काठमाडौँको मध्यबानेश्वरमा नेपाल पत्रकार महासङ्घ काठमाडौं शाखाका सदस्यसमेत रहेका बोहरामाथि अज्ञात व्यक्तिले आक्रमण गरेको महासङ्घ काठमाडौं शाखाले जनाएको छ,’ महासचिव दाहालले जारी गरेको विज्ञप्तिमा भनिएको छ, ‘कुनै पनि बहानामा पत्रकारमाथि हुने यस्ता हरकत प्रेस स्वतन्त्रता विरोधी हो । प्रेस विरोधी यो घटनाको महासङ्घ कडा शब्दमा भर्त्सना गर्दछ । महासङ्घ घटनामा संलग्नको तत्काल पहिचान गरी कानुनी दायरामा ल्याउन र पत्रकारको सुरक्षामा गम्भीर हुन सम्बन्धित निकायको ध्यानाकर्षण गराउँदछ ।’