कोलकत्ता: ‘प्रशिक्षार्थी डाक्टरको सामूहिक बलात्कार पछि हत्या’

कोलकोत्ता, ३१ साउन । कोलकाताको ट्रेनी डाक्टरको बलात्कार र हत्या प्रकरणमा नयाँ खुलासा भएको छ ।

अखिल भारतीय सरकारी चिकित्सक सङ्घका अतिरिक्त सचिव डा‍‍. सुवर्ण गोस्वामीले पोस्टमार्टम रिपोर्टलाई उद्धृत गर्दै यो बलात्कार नभएर सामूहिक बलात्कार हुन सक्ने बताएकी छिन् ।

प्रशिक्षार्थी चिकित्सकको प्राइभेट पार्टबाट १५१ एमजी वीर्य भेटिएको बताउँदै उनले यो दाबी गरेकी हुन् । ‘कुनै पनि व्यक्तिसँग यति धेरै मात्रामा वीर्य हुन सक्दैन, बलात्कारको घटनामा एकभन्दा बढी व्यक्ति संलग्न हुन सक्ने सम्भावना छ ।’

प्रशिक्षार्थी डाक्टरको शव अर्धनग्न अवस्थामा फेला परेको थियो  । गत अगस्ट ९ मा आरजी कार मेडिकल कलेज तथा अस्पतालको सेमिनार हलमा प्रशिक्षार्थी चिकित्सकको अर्धनग्न शव फेला परेको थियो । डाक्टरको गोप्य भाग, आँखा र मुखबाट रगत बगिरहेको थियो । पोस्टमार्टम रिपोर्टमा बलात्कारपछि हत्या भएको उल्लेख छ । जसका कारण भारतभरिमा चिकित्सकहरूले निरन्तर विरोध प्रदर्शन गरिरहेका छन् ।

उता, मेडिकल कलेजका आवासीय चिकित्सकहरूले अस्पताल प्रशासनले प्रमाणमा छेड छाड गरेको आरोप लगाएका छन् । उनीहरु भिडियो शेयर गर्दै भनेका छन् कि – ‘सेमिनार हलबाट २० मिटर टाढा रहेको चेस्ट विभागको कार्यालयमा तोडफोड भइरहेको छ । प्रहरीको अगाडि नै मर्मत सम्भारको नाममा प्रमाणहरू तोडफोड भइरहेको छ ।’