प्रहरीको आँखा अगाडी खुलेआम बालविवाह, प्रशासन मौन

विशाल बस्नेत/न्युज कारखाना 

२८ जेठ, महोत्तरी 

महोत्तरीको बर्दिबासमा प्रशासनको आँखा नै अगाडी खुलेआम बालविवाह भएको छ ।

बर्दिबासस्थित वडा नं १२ को बिजलापुरामा कानुनलाई समेत चुनौती दिँदै प्रहरीको आँखा अगाडी बालविवाह भएको हो ।

कानुनले वर्जित गरेको बालविवाहमा प्रहरी आफै प्रत्यक्षदर्शी बन्दा पनि रोक्न नसकेको स्थानीयहरूले आरोप लगाएका छन् ।

जन्म दर्ता अनुसार केटीको उमेर १६ वर्ष ६ महिना मात्र देखिएको छ भने केटाको उमेर २० भन्दा बढी भएको अभिभावकहरूले बताए ।

केटीका बुबा हकिम बैठाले आफ्नी छोरीलाई ललाई-फकाई प्रलोभनमा पारेर केटाले भगाएको भन्दै दुई हप्ता अगाडी इलाका प्रहरी कार्यालय बर्दिबासमा उजुरी समेत दिएका थिए ।

अभिभावकहरूको उपस्थितिमा केटा र केटीलाई आफ-आफ्ना घर फर्काउने सहमति भएर छाडेको प्रहरी कार्यालयको भनाई छ तर २७ जेठमा एकाएक गाउँमा अभिभावकहरूमा सहमति बनेर मुस्लिम संस्कारअनुसार विवाह भएको स्थानीय हरदेव महतोले बताए ।

विवाह हुने गाँउभरी हल्ला चलेपछि स्थानीयहरूले प्रहरीलाई खबर गर्दा पनि उनीहरू घटनास्थलमा नआएको स्थानीयहरूको गुनासो छ । तर प्रहरीले भने यो विषयमा जानकारी नभएको दाबी गरेको छ ।

केटा र केटीका अभिभावक निर मुहम्मद बैठा र हकिम बैठालाई सहमति गराएर विवाह नगराउने सर्तमा छाडेको तर कानुनविपरित विवाह भएको रहेछ भने कानुनीरुपमा नै उपचार खोज्ने इलाका प्रहरी कार्यालय प्रमुख रेवती रमण पोखरेलले बताए ।

स्थानीय जनप्रतिनिधि तथा वडा अध्यक्ष राम किशोर साहले पनि बालविवाह भएको स्वीकार गरेका छन् । ‘स्थानीयहरूले मलाई पनि फोन गरेर जानकारी गराएका छन् ।’ अध्यक्ष साहले भने । ‘रातारात मौलीको सहमतिमा विवाह भएको र भोज पनि खाएको सुनेको छु, म आफै त्यहाँ जाँदै छु ।’