आज अन्तर्राष्ट्रिय श्रमिक दिवस, मसालले नवौँ महाधिवेशनको घोषणा सभा गर्दै 

काठमाडौँ, १९ वैशाख । सरकारले आज सार्वजनिक बिदा दिएको छ । 

मे १ अर्थात् अन्तर्राष्ट्रिय श्रमिक दिवसको अवसरमा सरकारले सार्वजनिक बिदा दिएको हो ।  

अन्तर्राष्ट्रिय श्रमिक दिवसका यस अवसरमा नेपालमा विभिन्न मजदुर सङ्घ सङ्गठनहरूले विभिन्न कार्यक्रम गरी मनाउँदै छन् । यस दिवसको अवसरमा देशै भरी विभिन्न अन्तरक्रिया, गोष्ठी आदि कार्यक्रमको आयोजना हुनेछ । विश्वका साथै नेपालमा पनि विविध कार्यक्रम गरी यो श्रमिक दिवस मनाइँदै आइएको छ ।

सन् १८८६ मा अमेरिकाको सिकागो राज्यमा ८ घण्टा काम, आठ घण्टा आराम र ८ घण्टा मनोरञ्जनको माग गर्दै आन्दोलन भएको थियो । मजदुरहरूले गरेको सो विश्व प्रख्यात आन्दोलन दबाउनका लागि अमेरिकन प्रहरी बम प्रहार गरिएको घटनाको सम्झनामा विश्व भरी मे १ मा अन्तर्राष्ट्रिय श्रमिक दिवस मनाइँदै आएको छ ।

 सोही आन्दोलनका कारण विश्व भरी मजदुरहरूले आठ घण्टा मात्र काम गर्न गरी नयाँ व्यवस्था विश्वभर प्रचलनमा आएको हो ।

नेकपा (मसाल) ले अन्तर्राष्ट्रिय मजदुर दिवसको अवसर पारेर बुधवार दिउँसो १२ बजे पार्टीको नवौँ महाधिवेशनको घोषणा सभा गर्दै छ ।

विभिन्न जिल्ला समितिले एकै दिन कार्यक्रम राखेर देशव्यापी घोषणा सभा गर्न लागिएको मसाल केन्द्रीय कार्यालयले जनाएको छ ।

काठमाडौँको रत्नपार्कस्थित शान्ति वाटिकामा पार्टीले आज दिउँसो कार्यक्रम गर्ने भएको छ । सभालाई राष्ट्रिय जनमोर्चाका अध्यक्ष चित्रबहादुर केसी, नेकपा(मसाल) का प्रवक्ता रामप्रकाश पुरीलगायत नेताहरूले सम्बोधन गर्ने कार्यक्रम रहेको छ ।

मसालले नवौँ महाधिवेशनको सन्देशसँगै गत वर्ष देशव्यापी रूपमा सञ्चालन गरेको ऐतिहासिक तीन अभियानको औपचारिक समापन पनि गर्दै छ ।

यसका साथै अन्तर्राष्ट्रिय मजदुर दिवस पनि मनाइने नेकपा (मसाल) ले जनाएको छ ।