मस्को आक्रमणमा मृत्यु हुनेको सङ्ख्या ९३ पुग्यो,  दुई सन्दिग्ध पक्राउ

काठमाडौँ । मस्कोस्थित कन्सर्ट हल (क्रोकस सिटी हल) मा बन्दुकधारीले अन्धाधुन्ध गोली चलाउँदा मृत्यु हुनेको सङ्ख्या ९३ पुगेको छ भने १५२ भन्दा बढी घाइते भएका छन् । 

शुक्रवार राति मस्कोको क्रोकस सिटी हलमा भएको आतङ्कवादी हमलामा मृत्यु हुनेको सङ्ख्या ९३ पुगेको रुसको अनुसन्धान समिति (आइसीआर) ले अपडेट दिएको हो । 

घाइतेहरूको अवस्था गम्भीर रहेकाले मृतकको सङ्ख्या थप बढ्न सक्ने आइसीआरले जनाएको छ ।  आन्तरिक मामिला मन्त्रालय र सङ्घीय सुरक्षा सेवाको परिचालन एकाइहरूसँग आफ्ना अनुसन्धानकर्ताले मिलेर काम गरिरहेको आईसीआरले जनाएको छ ।

मृतकको शवको जाँच भइरहेको छ भने अपराध स्थलबाट हतियार र गोला बारुदसहितका सामग्री प्रमाण स्वरूप जफत गरिएको छ ।  घटनास्थलमा रहेका आरआईए नोभोस्ती समाचार संस्थाका सम्वाददाताका अनुसार नकाबधारी आक्रमणकारीले शुक्रवार एक्कासि भवनभित्र पसेर गोली चलाउनुका साथै भीडमा विस्फोटक पदार्थ फ्याँकेका थिए ।

घटनाको जिम्मेवारी इस्लामिक स्टेट समूह (आइएसआइएस) ले लिएको र आफ्ना लडाकुहरूले आक्रमण गरेर सकुशल आफ्नो स्थानमा फर्किएको बताएको छ ।

मस्को आक्रमणमा संलग्न दुई सन्दिग्ध पक्राउ: अधिकारी

 रुसमा आतङ्कवादी हमला गर्ने २ जना पक्राउ परेका छन् ।

 
रुसी प्रहरीले मस्को आक्रमण गराएको आशङ्कामा दुई जनालाई पक्राउ गरेको एक रुसी सांसदले बताएका छन् ।

बिबिसीका अनुसार संदिग्धहरूलाई मस्कोबाट करिब ३४० किलोमिटर (२१० माइल) दक्षिण पश्चिममा रहेको ब्रायान्स्क क्षेत्रमा कारको पछि लागेर  पक्राउ गरिएको थियो । प्रारम्भिक जानकारी उद्धृत गर्दै रुसी सांसद एलेक्सनाडर खिन्स्टाइनले सञ्चार माध्यमलाई भने ।

अन्य सन्दिग्धहरू नजिकैको जङ्गलमा भागेका र खोजी भइरहेको उनले जानकारी दिएका छन् ।

मस्कोको एक कन्सर्टमा भएको गोलाबारीमा ५ जना संलग्न भएको फुटेजहरूमा देखिएको छ। 

मस्कोमा शुक्रवार साँझ भएको हमलामा अहिलेसम्म ९३ जनाको ज्यान गइसकेको छ भने १५२ भन्दा बढी घाइते भएका छन् ।