वर्तमान सरकारलाई समर्थन गर्न नसकिने ः मसाल

काठमाडौँ । वर्तमान सरकारले भ्रष्टाचारको आरोपमा मुछिएका व्यक्तिलाई गृह मन्त्रालयको जिम्मा दिएर त्यस सम्बन्धी कारबाहीलाई दबाउन बाटो खोलिदिएको भन्दै नेकपा(मसाल)ले आपत्ति प्रकट गरेको छ । प्रतिगामी दिशामा उन्मुख एमाले तथा अमेरिकी साम्राज्यवादको निर्देशनमा चल्ने तथा सहकारी भ्रष्टाचारका ठुला ठुला काण्डहरूमा मुछिएका व्यक्ति समेतको सहभागितामा  बनेको वर्तमान सरकारबाट प्रतिगमन र भ्रष्टाचारलाई बल पुग्ने तथा राष्ट्रियतामा गम्भीर आँच पुग्ने भन्दै पार्टीले वर्तमान सरकारलाई समर्थन गर्न नसक्ने बताएको छ । पार्टी महामन्त्री मोहनविक्रम सिंहद्वारा जारी वक्तव्यको पूर्ण पाठ यस प्रकार छ ः

 प्रतिगमनका विरुद्धको गठबन्धनको विघटनप्रति ने.क.पा.(मसाल)ले पहिले नै आफ्नो विरोध जनाइसकेको  छ । त्यो बेला हामीले सरकारले अपनाउने नीतिहरूका आधारमा त्यसप्रतिको आफ्नो नीति र कार्यक्रमका आधारमा त्यसप्रतिको नीति निर्धारित गर्दै जाने कुरा बताएका थियौँ । सरकारको नीति र कार्यक्रम स्पष्ट हुनको लागि हामीले अझै अरू पर्खनुपर्नेछ । तैपनि मन्त्रीपरिषद्को गठन र मन्त्रालयको विभाजनबारे सरकारले अपनाएका नीतिहरूबाट यो सरकारलाई समर्थन गर्न नसकिने कुरा प्रस्ट भएको छ र, त्यसैले, हामीले प्रचण्ड सरकारलाई पहिले दिएको समर्थन फिर्ता लिने निर्णय गर्दछौँ । 

यो कुराप्रति हाम्रो पार्टीको गम्भीर ध्यान गएको छ कि प्रतिगमनका विरुद्धको हाम्रो गठबन्धन एमालेको प्रतिगामी नीतिका विरुद्ध नै केन्द्रित थियो र चुनावका बेलामा पनि त्यससित कुनै चुनावी तालमेल नगर्ने ५ दलीय समझदारी बनेको थियो । तर अहिले त्यसैसित गठबन्धन गर्ने नीति अपनाइएको छ र त्यस प्रकारको गठबन्धनको नीतिलाई हामीले निश्चित रूपले समर्थन गर्न सक्दैनौँ । त्यसका साथै प्रत्यक्ष रूपले अमेरिकी साम्राज्यवादी नीति पूरा गर्न बनेको र त्यसको निर्देशनमा चल्ने सङ्गठन तथा हालसालै पनि सहकारी सम्बन्धी भ्रष्टाचारका ठुला ठुला मुद्दाहरूमा मुछिएको र त्यसबारे विभिन्न तहमा छानबिन भइरहेको अवस्थामा त्यसका नेतालाई गृह मन्त्रालय जस्तो महत्त्वपूर्ण मन्त्रालय दिने कार्यप्रति हामीले गम्भीर आपत्ति वा विरोध प्रकट गर्दछौँ । यो कुरा प्रस्ट छ कि त्यो सङ्गठनका नेतालाई गृह मन्त्रालय दिनुको अर्थ उनका विरुद्ध चलेका सहकारी सम्बन्धी भ्रष्टाचारका सबै मुद्दाहरूको कारबाही रोक्नु नै हुनेछ । उनका विरुद्ध दोहोरो पासपोर्टको मुद्दा पनि सर्वोच्चमा चलिरहेको छ । 

त्यो अवस्थामा उनका विरुद्ध विभिन्न तहमा चलेका मुद्दाहरूलाई स्वतन्त्र र निष्पक्षतापूर्वक अगाडि बढाइने छ वा सरकारको दबाबमा आएर ती मुद्दाहरूको कारबाहीलाई दबाइनेछ र उनलाई उन्मुक्ति दिइनेछ ? त्यो कुरा ता हेर्न बाँकी नै छ । तर वर्तमान सरकारले त्यस प्रकारको भ्रष्टाचारको आरोपमा मुछिएका व्यक्तिलाई गृह मन्त्रालयको जिम्मा दिएर त्यस सम्बन्धी कारबाहीलाई दबाउन बाटो खोलिदिएको कुरा प्रस्ट छ । त्यस प्रकारको व्यक्तिलाई गृह मन्त्रालय दिने जस्तो कार्यले प्रधानमन्त्री प्रचण्डको गम्भीर प्रकारको लाचारीपनलाई नै बताउँछ । उनले कसको दबाबमा आएर त्यस प्रकारको कार्य गरेका हुन् त्यो कुरा सायद पछि स्पष्ट हुँदै जानेछ ।

अन्तमा, प्रतिगामी दिशामा उन्मुख एमाले तथा अमेरिकी साम्राज्यवादको निर्देशनमा चल्ने तथा सहकारी भ्रष्टाचारका ठुला ठुला काण्डहरूमा मुछिएका व्यक्ति समेतको सहभागितामा  बनेको वर्तमान सरकारबाट प्रतिगमन र भ्रष्टाचारलाई बल पुग्ने तथा राष्ट्रियतामा गम्भीर आँच पुग्ने कुरा प्रस्ट छ । त्यसैले हाम्रो पार्टीले त्यो सरकारलाई समर्थन गर्न नसक्ने कुराको जानकारी गराउन चाहन्छौँ । त्यो सरकारले आगामी दिनहरूमा अपनाउने नीति र क्रियाकलापको आधारमा हामीले त्यसप्रतिका आगामी नीतिहरू स्पष्ट गर्दै जानेछौँ ।