बङ्गलादेशको रेस्टुरेन्टमा आगलागी हुँदा ४३ जनाको जलेर मृत्यु, ७५ बढी घाइते

ढाका, १८ फागुन । बङ्गलादेशको एक बहुतले भवनमा आगलागी हुँदा कम्तीमा ४३ जनाको मृत्यु भएको छ ।

स्थानीय सञ्चारमाध्यमका अनुसार राजधानी ढाकामा बिहीबार स्थानीय समय अनुसार करिब १० बजे एक रेस्टुरेन्टमा लागेको आगलागी फैलिदा सो सङ्ख्यामा मृत्यु भएको हो ।

सरकारी सुरक्षा अधिकारीका अनुसार त्यस आगलागीमा परेका ७५ जनालाई उद्धार गरी दर्जनौँलाई आसपासका अस्पतालमा लगिएको थियो ।

बङ्गलादेशका स्वास्थ्य मन्त्री सामन्त लाल सेनले ढाका मेडिकल कलेज अस्पतालमा महिला र बालबालिकासहित कम्तीमा ३३ जनालाई मृत घोषणा गरिएको बताए ।

सहरको मुख्य बर्न्स अस्पतालमा कम्तीमा पनि १० जनाको मृत्यु भएको थियो भने २२ जनाको अवस्था गम्भीर रहेको उनले बताए  ।

आगलागी दुई घण्टापछि नियन्त्रणमा आएको र कारणबारे अनुसन्धान भइरहेको दमकल विभागले जनाएको छ ।

डेली बङ्गलादेश अखबारका अनुसार आपत्कालीन सेवाहरूलाई कच्ची भाइ रेस्टुरेन्टमा बोलाइएको थियो, जुन रेस्टुरेन्ट रहेको भवन सात तलाको छ।