एमसीसी नेपाली जनताको विरुद्ध भएको पुष्टि भयो : मसाल

काठमाडौँ । एमसीसीको विषयले नेपालको राजनीतिमा निकै बहसको विषय भएको थियो । तर अहिले एमसीसीले दिएको अभिव्यक्तिले यो नेपाल तथा नेपाली जनताविरुद्ध भएको पुष्टि भएको छ । सोही विषयलाई प्रस्ट पार्दै नेकपा(मसाल)का महामन्त्री मोहनविक्रम सिंहले एक वक्तव्य जारी गरेका छन् । वक्तव्यको पाठ यस प्रकार छ तः एमसीसी कार्यान्वयनको सन्दर्भमा ठेक्काका विषयलाई लिएर भएको विवादमा एमसीए (मिलिनियम च्यालेञ्ज एकाउन्ट)ले सर्वोच्च अदालतलाई एमसीसी सम्झौता नभएर सन्धि भएको र उक्त सन्धिको प्रावधान नेपालको संविधान र कानुनभन्दा माथि भएको उल्लेख गरेको कुरा सार्वजनिक भएका छन् ।

पहिले एमसीसी सम्झौताका प्रावधान नेपालको संविधान र कानुन भन्दा माथि राखिएको र त्यसबाट नेपालको सार्वभौमिकता, स्वतन्त्रता र स्वाधीनतामाथि चुनौती रहेकोले त्यसका विरुद्ध नेपाली जनताले सङ्घर्ष गरेका थिए । जनताको त्यसरी विरोध हुँदाहुँदै पनि संसदबाट त्यसलाई पारित गरिएको  थियो । अहिले एमसीएको उक्त अभिव्यक्तिले नेपाली जनताको एमसीसी विरुद्ध भएको आन्दोलनको औचित्यलाई पुष्टि गरेको छ । हामीले एमसीएको त्यस प्रकारको अभिव्यक्तिको विरोध र भर्त्सना गर्दै एमसीसी नेपालको सार्वभौमिकता, स्वतन्त्रता र स्वाधीनता विरुद्ध रहेकोले त्यसलाई खारेज गर्नुपर्नेमा जोड दिन चाहन्छौँ ।

मिटर व्याज पीडितले लामो समयदेखि सङ्घर्ष गर्दै आएका छन् । तर उनीहरूको समस्याको समाधान अझै हुन सकेको  छैन । त्यसैले अहिले उनीहरू फेरि आन्दोलित भएका छन् । त्यसै गरी लघुवित्त पीडितहरूले पनि सङ्घर्ष गरिरहेका    छन् । त्यसरी भइरहेका सङ्घर्षप्रति ऐक्यबद्धता प्रकट गर्दै उनीहरूका समस्यालाई यथाशीघ्र र सार्थक रूपले समाधान गर्नका लागि हामीले सरकारको ध्यान आकर्षित गर्दछौँ ।