१० हजार मेगावाट बिजुली भारत निर्यात गर्ने सहमति पत्रमा हस्ताक्षर

काठमाडौँ, १९ पुस । नेपालबाट १० वर्षमा भारतमा १० हजार मेगावाट बिजुली निर्यात गर्ने सहमति पत्रमा दुवै देशले हस्ताक्षर गरेको छ । काठमाडौँमा बिहीबार नेपाल र भारतबिच बिजुली निर्यातसम्बन्धी दीर्घकालीन सहमति पत्रमा हस्ताक्षर भएको हो ।

ऊर्जा, जलस्रोत तथा सिँचाइ मन्त्रालयमा मन्त्री शक्तिबहादुर बस्नेतको उपस्थितिमा नेपालका तर्फबाट ऊर्जा, जलस्रोत तथा सिँचाइ मन्त्रालयका सचिव गोपाल सिग्देल र भारतका ऊर्जा सचिव पङ्कज अग्रवालले दीर्घकालीन ऊर्जा व्यापारसम्बन्धी सहमति पत्रमा हस्ताक्षर गरेका छन् ।

यसअघि १० वर्षमा १० हजार मेगावाट बिजुली भारतमा निर्यात गर्ने सम्बन्धमा दुवै देश सहमत भएका थिए । तर, बिहीबार हस्ताक्षर भएसँगै १० वर्षमा भारतमा १० हजार मेगावाट बिजुली नेपालले निर्यात गर्ने सहमतिमा सार्थकता पाएको छ ।

गत जेठमा भएको प्रधानमन्त्री पुष्पकमल दाहाल प्रचण्डको भारत भ्रमणका क्रममा १० वर्षमा भारतमा १० हजार मेगावाट बिजुली निर्यात गर्ने सहमति भए पनि सम्झौता पत्रमा भने हस्ताक्षर भएको थिएन ।