एनआरएनएको असन्तुष्ट समूहले बोलाए अलग भेला

काठमाडौँ, १३ पुस । गैर आवासीय नेपाली सङ्घका असन्तुष्ट समूहले अलग भेला बोलाएका छन् ।

गत एनआरएनए निर्वाचनमा पराजित अध्यक्षका प्रत्याशी आरके शर्मा समूहले अलग भेला बोलाएका हुन ।

गत अगस्टमा सम्पन्न ११ औँ महाधिवेशनमा बद्री केसी पक्षले धाँधली गरेपछि आफूलाई आधिकारिक अध्यक्षको रूपमा अघि दाबी गर्दै आएका शर्माको समूहले कार्य विभाजनमार्फत संस्थालाई चुस्त र गतिशील बनाउने योजना बनाएको भन्दै अलग भेला बोलाएका हुन । जसअनुसार सोमबार शर्माले अन्तर्राष्ट्रिय समन्वय परिषद् (आइसिसी) को बैठक आह्वान गरेका हुन ।

शर्माले निवर्तमान अध्यक्ष बद्री केसी र उनको समूहले धाँधली गरेको आरोप लगाउँदै आएका छन् । परराष्ट्र मन्त्रालयले आफूहरूलाई छिट्टै न्याय दिने विश्वासमा रहेको जनाउँदै आएका शर्माले अलग भेला बोलाए पछि एनआरएनको आन्तरिक विवाद थप चर्किने देखिएको छ ।

तर, एनआरएनए अध्यक्ष केसीको समूहले भने उक्त भेलाको वैधानिकता नरहेको जनाउँदै सो शर्माले बोलाएको बैठकमा उपस्थित नहुन निर्देशन दिएका छन् ।