पोखरा ठण्डर्सलाई पेनाल्टीमा हराउँदै धनगढी एनएसएलको फाइनलमा

काठमाडौँ, ९ पुस । धनगढी एफसी जारी नेपाल सुपर लिग (एनएसएल) फुटबलको फाइनलमा पुगेको छ ।

यस सिजनको पहिलो क्वालिफायरमा धनगढी एफसीले पेनाल्टी सुट आउटमा पोखरा ठण्डर्सलाई ४-३ गोल अन्तरले पराजित गर्दै फाइनलमा पुगेको हो ।

निर्धारित ९० मिनेटको खेलमा दुवै टिमले १-१ गोल गरेपछि यस खेलमा अतिरिक्त ३० मिनेटमा थप १-१ गोल भएपछि २-२ गोलको बराबरीमा खेल सकिएको थियो । त्यसपछि खेलको निर्णय पेनाल्टी सुट आउटमा गरिएको थियो ।

पोखरा ठण्डर्सले अतिरिक्त समयको पहिलो हाफको १०औँ मिनेटमा स्टेफेन कोजोको गोलमा अग्रता लिए पनि खेलको १२०औँ मिनेटमा धनगढीका अहमद हिजाजीले गोल गर्दै खेल २-२ को बराबरी गरेका थिए ।

यस अघि खेलको पाँचौँ मिनेटमा नै आयुष घलानको गोलमा पोखराले अग्रता बनाएको थियो भने खेलको ५३औँ मिनेटमा धनगढी एफसीले देवेन्द्र तामाङको गोलमा बराबरी गर्दै खेलमा फर्किएको थियो ।

यो जितपछि धनगढी फाइनलमा पुगेको छ । त्यस्तै हारका बाबजुद पोखरा ठण्डर्सले अब दोस्रो क्वालिफायर खेल्ने अवसर पाउने छ । अब पोखराले काठमाडौँ रेजर्स र ललितपुर सिटी एफसीबीचको इलिमिनेटरको विजेतासँग दोस्रो क्वालिफायर खेल्ने छ ।

इलिमिनेटरको खेल मङ्गलवार हुने छ भने दोस्रो क्वालिफायर बिहीबार हुँदै छ । त्यस्तै यस सिजनको फाइनल खेल भने शनिवार हुँदै छ ।