भूकम्पमा परी चीनमा १ सय बढीको मृत्यु

बेइजिङ, ३ पुस । चीनको गान्सु प्रान्तमा सोमबार राति शक्तिशाली भूकम्पको धक्का महसुस गरिएको छ । भूकम्पको तीव्रता रेक्टर स्केलमा ६.२ मापन गरिएको छ ।

चाइना अर्थक्वेक नेटवर्क सेन्टर (CENC)का अनुसार पश्चिमी चीनको गान्सु प्रान्तमा सोमबार राति १२ बजेर ३० मिनेटमा भूकम्पको धक्का महसुस गरिएको थियो ।

समाचार एजेन्सी एएफपीका अनुसार चीनको गान्सु प्रान्तमा गएको भूकम्पमा परी मृत्यु हुनेको सङ्ख्या १०० नाघेको छ भने दुई सयभन्दा बढी घाइते भएका छन् ।

भूकम्पको तीव्रता यति शक्तिशाली थियो कि धेरै भवनहरू ध्वस्त भएको बताइएको छ । भवनहरू ध्वस्त भएका कारण धेरै मानिसहरू भग्नावशेषमा पुरिएका छन् ।

योसँगै छिङहाई प्रान्तको मिन्हे काउन्टी र झुनुआ सालार स्वायत्त काउन्टीमा दुई जनाको मृत्यु भएको छ ।

एस जियोलोजिकल सर्भेका अनुसार भूकम्पको केन्द्रबिन्दु चीनको लान्झाउ बाट १०२ किलोमिटर दक्षिण पश्चिममा ६ माइल गहिराइमा थियो।

चाइना सेन्ट्रल टेलिभिजनका अनुसार छिङहाई प्रान्तको हाई डोङ सहरमा पनि ११ जनाको मृत्यु भएको छ भने सयभन्दा बढी घाइते भएका छन् ।

राज्य समाचार एजेन्सी सिन्ह्वाले भूकम्पले भत्किएका घरहरूलगायत व्यापक क्षति पु¥याएको र मानिसहरू सुरक्षाका लागि सडकमा भागिरहेको बताएको छ ।

भूकम्पपछि मङ्गलवार बिहानैदेखि उद्धार कार्य जारी रहेको छ । चिनियाँ राष्ट्रपति सी चिनफिङले भूकम्पबाट प्रभावित जनताको जीवन बचाउन र राहत उपलब्ध गराउन हर सम्भव प्रयास गर्नुपर्ने बताएका छन्।