लेबनानको सीमामा इजरायली सेना र हिजबुल्लाह समूहबिच गोली हानाहान

तेल अहिव, २ पुस । इजरायल–लेबनान सीमामा फेरि गोलीवारि आदान प्रदान भएको छ ।

हिजबुल्लाह लडाकुहरूले इजरायली सेनाहरू विरुद्ध धेरै आक्रमणहरू गरेपछि इजरायलले पनि जवाफी कारबाही स्वरूप लेबनान सीमामा गोलीवारि सुरु गरेको हो ।

हिजबुल्लाह समूहले सीमा नजिकै उत्तरी इजरायलको किबुट्ज हानिताको किनारमा इजरायली सेनालाई लक्षित गरेको र हताहत भएको बताएको छ। यसले इजरायली सैनिकहरूद्वारा सञ्चालित चौकीमा दोस्रो आक्रमणको दाबी पनि गरेको छ, जहाँ केही हताहत भएको पनि बताएको छ।

इजरायली सेनाले जवाफ दिँदै लेबनानमा हिजबुल्लाह पूर्वाधारमा प्रहार गरेको बताएको छ।

युद्ध सुरु भएदेखि सीमामा झडपहरू जारी छन्, जसमा झन्डै १०० हिजबुल्लाह लडाकु र कम्तीमा १५ नागरिकको मृत्यु भइसकेको छ। तर हालसम्म, त्यस्ता गोली हानाहान धेरै हदसम्म सीमावर्ती क्षेत्र र सैन्य चौकीहरूमा मात्र सीमित छन्।