७७औँ परिसंवाद कार्यक्रम सम्पन्न 

माघ ११, काठमाडौँ । किसान अधिकार र कृषि साहित्य विषयमा ७७औँ परिसंवाद कार्यक्रम सम्पन्न भएको छ । प्रगतिशील लेखक सङ्घको आयोजनामा सम्पन्न भएको सो कार्यक्रमको विषयवस्तु प्रस्तोता किसान नेता भैरव रेग्मी हुनुहुन्थ्यो ।

माघ ११ गते सङ्घको बागबजारस्थित कार्यालयमा भएको कार्यक्रममा नेता रेग्मीले किसानलाई राज्य व्यवस्थाले अवहेलना गरिरहेको सन्दर्भमा ‘किसानका वेदनाहरू समेटेर साहित्यको सिर्जना गर्नुपर्ने’ बताउनुभयो – ‘प्रलेसजस्तो सांस्कृतिक मोर्चाले किसान अधिकारलाई सम्बोधन गर्दै बढी भन्दा बढी कविता, कथा, गीतहरूका साथै दार्शनिक रूपमा पनि चर्चा गर्नुपर्दछ ।’

किसानका उत्पादनलाई प्रयोग गर्ने तर प्रयोग गरिसकेपछि उनीहरूको श्रमलाई बिर्सनु दुःखद विषय भएको बताउँदै किसान नेता रेग्मीले ‘बिचौलिया संस्कृति बलियो हुँदै जाँदा देशका किसानहरूको अवस्था बेहाल हुँदै गयो ।’ वहाँले अगाडि भन्नुभयो, ‘महिला किसानहरूको अवस्था त झनै जटिल छ । उनीहरूको पिडालाई राज्यले सम्बोधन गर्न सकिरहेको छैन । त्यसैले पनि लेखक साहित्यकारहरूले किसान अधिकारलाई सशक्त रूपमा सम्बोधन गर्नुपर्दछ ।

मार्क्सले पनि मजदुरको कुरा उठाउँदा कृषि मजदुरको कुरा नउठाएको बताउँदै लेखक रेग्मीले भन्नुभयो, ‘नेपालको सरकार पुग्नेहरूले किसानका समस्याहरू, आफ्नो घोषणापत्रमा मात्र सीमित राखे । देशमा कृषिको योगदान ३२ प्रतिशत तर सरकारले कृषिमा ४ प्रतिशत मात्र बजेट छुटाउनु एकदमै असमान व्यवहार हो ।’

प्रलेसका अध्यक्ष डा.मधुसूदन गिरीको अध्यक्षतामा भएको परिसंवाद कार्यक्रमको सञ्चालन सङ्घका उपाध्यक्ष नमुना शर्माले गर्नुभएको थियो । परिसंवाद कार्यक्रमको विषयवस्तुको बारेमा संयोजक समीर सिंहले प्रस्ट पार्नु भएको थियो ।

कार्यक्रममा पूरक टिप्पणी गर्नेहरूमा प्रा.डा.जिवेन्द्रदेव गिरी, गोपिरमण उपाध्याय, डा.कृष्ण अधिकारी, केबी घले, धनबहादुर मगर, नीलकण्ठ अमात्य, तिलप्रसाद न्यौपाने, मोहन मल्ल, राजेश गोसाईं, जगत् वाशिष्ठ, सङ्घराम महर्जन लगायत हुनुहुन्थ्यो ।