दोस्रो विश्वयुद्धपछि विदेशी सैनिक पहिलो पटक रुसी भूमिमा

काठमाडौँ । दोस्रो विश्वयुद्धपछि विदेशी सैनिक रुसी भूमिमा अहिले पहिलो पटक पुगेको छ । रुसको कुर्स्क क्षेत्रमा करिब दुई सातादेखि युक्रेनी सेनाको उपस्थिति रहेको छ ।

युक्रेनले रुसको कुर्स्क क्षेत्रमा रहेको रणनीतिक दृष्टिले महत्त्वपूर्ण अर्को पुल ध्वस्त पारेको दाबी गरेको छ । युक्रेनी सेनाले केही दिनअघि रुसको कुर्स्क क्षेत्रमा घुसपैठ गरेको थियो । युक्रेनी सेनाले आइतबार पुलमा भएको आक्रमणको भिडियो पनि सार्वजनिक गरेको छ । यो हमला झानोएको सेयाम नदी माथि गरिएको बताइएको छ ।

रुसले फेब्रुअरी २०२२ मा युक्रेनमा आक्रमण गर्न थालेको थियो । पछिल्लो समय रुसले पूर्वी युक्रेनका क्षेत्रहरूमा आफ्नो नियन्त्रण बढाउन क्रमशः अघि बढिरहेको छ । यस क्रममा युक्रेनी सेनाले रणनीतिक रूपमा रुसको कुर्स्क क्षेत्रमा कब्जा गर्न सुरु गरेपछि रुस-युक्रेन युद्धको परिदृश्य बदलिने विश्लेषण गर्न थालिएको छ । त्यसयता रुसले आफ्ना हजारौँ नागरिकलाई यस क्षेत्रबाट बाहिर निकालेको छ ।

युक्रेनी वायुसेनाका कमान्डर लेफ्टिनेन्ट जनरल मिकोला ओलेस्चुकले आक्रमणको भिडियो जारी गर्दै सामाजिक सञ्जालमा लेखेका छन्, ‘अर्को पुल ध्वस्त भएको छ ।’

युक्रेनी सेनाको भिडियोमा पुलमाथि धुवाँको ठुलो मुस्लो र यसको केही भाग ध्वस्त भएको देखाइएको छ । यद्यपि यो आक्रमण कहिले भएको हो भन्ने खुलाइएको छैन ।

आक्रमणपछि युक्रेनी राष्ट्रपति भोलोडिमिर जेलेन्स्कीले कुर्स्कमा सैन्य घुसपैठको उद्देश्य रुसी आक्रमणलाई रोक्न ‘बफर जोन’ बनाउनु रहेको बताएका छन् । युक्रेनले ध्वस्त गरेको यस पुलबाट रुसले त्यो आफ्ना सेनाहरूलाई आपूर्ति गर्न प्रयोग गर्ने गरेको बताइएको छ ।

यसअघि, युक्रेनी सैन्य विश्लेषकहरूले यस क्षेत्रमा तीन वटा त्यस्ता पुलहरू पहिचान गरेका थिए ।

समाचार एजेन्सी रोयटर्सका अनुसार दुई वटा पुल या त ध्वस्त भएका छन् वा गम्भीर रूपमा क्षतिग्रस्त भएका छन् । युक्रेनी सेनाले रुसी सीमाभित्र रहेको कुर्स्क क्षेत्रमा घुसपैठ गरेको झन्डै दुई सातापछि उनीहरू यहाँ बस्ने योजनामा ​​रहेको स्पष्ट हुँदै आएको छ ।

जेलेन्स्कीले युक्रेनमा थप रुसी आक्रमणहरू रोक्न कुर्स्क आक्रमणमा बफर जोन सिर्जना गर्ने उद्देश्य रहेको स्पष्ट गरेका छन् । अर्को तर्फ रुसले यो घुसपैठलाई उत्तेजक भन्दै यसको उचित जवाफ दिने बताएको छ ।