नेपाल विश्व खुसी सूचकाङ्कमा ९३औँ स्थानमा

काठमाडौँ । विश्व खुसी प्रतिवेदनमा नेपाल संसारको सबैभन्दा खुसी हुने देशको ९३औँ स्थानमा रहेको छ । विश्व खुसी प्रतिवेदन, २०२४ अनुसार १४३ देशहरूमध्ये खुसी सूचकाङ्कमा नेपालले ९३औँ स्थानमा रहेको हो ।

सो प्रतिवेदन अनुसार उक्त सूचीको पहिलो स्थानमा फिनल्यान्ड छ । फिनल्यान्ड लगातार सात वर्षदेखि शीर्ष स्थानमा रहँदै आएको छ ।

त्यस्तै फिनल्यान्डपछि प्रमुख डेनमार्क, आइसल्यान्ड, स्विडेन, इजरायल, नेदरल्याण्ड, नर्वे, लक्जमवर्ग, स्वीजरल्याण्ड र अस्ट्रेलिया रहेका छन् । 

त्यस्तै यस सूचीमा छिमेकी देश चीन ६०औँ स्थानमा रहेको छ भने भारत १२६औँ स्थानमा रहेको छ । त्यस्तै यस सूचीको पुछारमा अफगानिस्तान रहेको छ ।

उक्त प्रतिवेदन गलुप, अक्सफोर्ड विश्वविद्यालयको वेलबिइङ रिसर्च सेन्टर, संयुक्त राष्ट्रसङ्घ दिगो विकास सोलुसन नेटवर्क र वर्ल्ड ह्यापिनेस रिपोर्टको सम्पादक बोर्डले प्रकाशन गरेका हुन् ।

विषय खुसी प्रतिवेदन आफ्नो जीवनशैलीलाई राम्रोदेखि खराबसम्मको शून्यदेखि १० नम्बर बिच अङ्क दिने गरी प्रश्न सोधेर तयार गरिएको बताइएको छ ।