नेदरल्याण्डसमाथि नेपालको शानदार जित

काठमाडौँ । नेपालले नेदरल्याण्डसमाथि शानदार जित हासिल गरेको छ । 

जारी त्रिकोणात्मक टी-२० सिरिज अन्तर्गतको खेलमा नेपाल ले शनिवार टियु मैदानमा सम्पन्न खेलमा नेपालले नेदरल्याण्डसलाई ६ विकेटले पराजित गरेको हो ।

नेदरल्याण्डसले दिएको १२१ रनको लक्ष्य पछाएको नेपालले १५.२ ओभरमा ४ विकेट गुमाउँदै लक्ष्य पुरा गरेको थियो । 

नेपालका लागि लागि कप्तान रोहित पौडेलले ४६ रन बनाए भने गुलशन झाले ३८ रन बनाएका थिए ।  त्यस्तै कुशल भुर्तेलले १२ र आसिफ सेखले ८ रन बनाएका थिए ।   

यस अघि टस जितेर पहिला ब्याटिङ गरेको नेदरल्याण्डसले १९.३ ओभरमा अल आउट हुँदै १२० रन बनाएको थियो ।

नेदरल्याण्डसका लागि म्याक्स ओ दाउदले सर्वाधिक ३१ रन बनाए भने टिम भान डेर मार्वेले २४ रन बनाएका थिए । त्यस्तै रोएलोफ भान डेर मार्वेले २३ तथा कप्तान स्कट एडवार्डसले १८ रन बनाएका थिए ।

त्यसै गरी नेपाली बलर प्रतिस जिसीले उत्कृष्ट बलिङ गर्दै ३ विकेट लिएका थिए । प्रतिसले ४ ओभरमा १३ रन दिएर ३ विकेट लिएका हुन । त्यसै गरी करण केसी र कुशल मल्लले २-२ विकेट  लिए भने दीपेन्द्र सिंह ऐरीले एक विकेट लिएका थिए ।

योसँगै सिरिजमा नेपालले ४ खेलमा दोस्रो जित हासिल गर्दै ४ अङ्क हासिल गरेको छ ।  त्यस्तै नेदरल्याण्डसले ३ खेलमा ४ अङ्क हासिल गरेको छ ।  त्यस्तै नामिबियाले ३ खेलमा एक जितसहित २ अङ्क हासिल गरेको छ । अब आइतबार हुने नामिबिया र नेदरल्याण्डसबीचको खेलपछि मात्र फाइनलमा पुग्ने २ देशको टुङ्गो लाग्ने भएको छ ।