पत्रकारलाई सरकारले सहयोग गर्नेछ: उपप्रधानमन्त्री खडका

काठमाडौँ, १३ माघ । उपप्रधानमन्त्री एवं रक्षा मन्त्री पूर्णबहादुर खड्काले पत्रकारिता क्षेत्रले नागरिक सचेतना अभिवृद्धि, सार्वजनिक सेवा प्रवाहमा सुदृढीकरण र  मानवअधिकारको संरक्षण र प्रवर्द्धनका क्षेत्रमा पैरवी गर्दै महत्त्वपूर्ण उपलब्धि हासिल गर्न योगदान दिएको बताएका छन् ।

पत्रकार कलेन्द्र सेजुवालद्वारा लिखित ‘फल्स फ्रन्ट पेज’ को आज विमोचन गर्दै रक्षा मन्त्री खडकाले पत्रकारिता क्षेत्रको व्यावहारिक र नीतिगत सुधारका लागि सरकारले आवश्यक सहयोग गर्ने विश्वास व्यक्त गरेका छन् ।

उपप्रधानमन्त्री खड्काले भने, “पत्रकारितालाई सही गोरेटोमा हिँडाउन सक्नुपर्दछ, त्यसका लागि हामी सबैको सामूहिक दायित्व पनि हो । पत्रकारिता क्षेत्रमा व्यावहारिक र संस्थागत सुधारका लागि थुप्रै काम गर्नुपर्ने आवश्यकता छ, यसका लागि नीतिगत र संरचनागत सुधारका सम्बन्धमा सरकारले सधैँ साथ र सहयोग रहने विश्वास दिलाउन चाहन्छु ।”

उनले नेपालको पत्रकारिता क्षेत्रलाई संस्थागत विकास र उच्च व्यावसायिक अभ्यास गराउने मूल दायित्व नेपाल पत्रकार महासङ्घको भूमिका अग्रणी र महत्त्वपूर्ण रहेको भन्दै यसका लागि सरकारले पनि आवश्यक सहयोग गर्ने बताए ।

उपप्रधानमन्त्री खड्काले जहानियाँ राणा शासनकालदेखि सुरु भएको नेपाली पत्रकारिताले राणा शासन विरुद्ध जनजागरण ल्याउनुका साथै, एकदलीय पञ्चायत विरुद्धको अभियान हुँदै बहुदलीय प्रजातन्त्र स्थापना र हालको सङ्घीय लोकतान्त्रिक गणतन्त्रको संस्थागत विकासका साथै विकास र समृद्धिको यात्रामा सञ्चार माध्यमले महत्त्वपूर्ण भूमिका खेल्दै आएकोसमेत उल्लेख गरेका छन् ।

उनले भने, “पत्रकारिता आवाजविहीनहरूको आवाज एवं समाजको ऐना भएकोले लोकतन्त्रलाई समुन्नत र नागरिकलाई सुसूचित गराउने सन्दर्भमा यसको महत्त्वपूर्ण भूमिका छ र यो आगामी दिनमा पनि कायम रहन्छ भन्ने मेरो विश्वास छ ।”

राज्यका अन्य क्षेत्रजस्तै पत्रकारिता क्षेत्रको पनि आफ्नै मूल्य, मान्यता, सिद्धान्त र आदर्श छवि हुने भन्दै यसले नागरिकको भरोसा अभिवृद्धिमा सहयोग सिद्ध हुनुपर्ने धारणा राखेका छन् ।  “यदाकदा पत्रकारिता क्षेत्रमा समेत अरू क्षेत्रको जस्तै कमी कमजोरी देखिने गरेको छ । पत्रकारले सत्य तथ्य, सन्तुलित र विश्वसनीय समाचार प्रवाह गर्ने मूल दायित्वबाट विचलित नभई नभई न्यायको पक्षमा सतिसाल जस्तो उभिनुपर्छ”, उपप्रधानमन्त्री खड्काले भने ।