प्रलेसले अन्तर्राष्ट्रिय कविता महोत्सव गर्ने

काठमाडौँ, पौष २४ । प्रगतिशील लेखक सङ्घले इलामको पर्यटकीय क्षेत्र, श्रीअन्तुमा अन्तर्राष्ट्रिय कविता महोत्सव गर्ने सङ्घका महासचिव डा.देवी दुलाल द्वारा जारी प्रेस वक्तव्यमा जानकारी जनाइएको छ । सङ्घको राष्ट्रिय परिषद् बैठक समेत गर्ने गरी नेपालको पर्यटकीय क्षेत्र इलाममा सो कार्यक्रम गर्ने तयारी गरिएको वक्तव्यमा उल्लेख छ ।

सङ्घको पौष २४ गते काठमाडौँको बागबजारस्थित केन्द्रीय कार्यालयमा अध्यक्ष डा.मधुसूदन गिरीको अध्यक्षतामा बसेको सचिवालय बैठकले नेपाल, भारत, बङ्गलादेश, भुटान लगायत विभिन्न देशका लेखक तथा कविहरूलाई बोलाएर कार्यक्रमलाई ऐतिहासिक रूप दिने वक्तव्यमा उल्लेख छ । ऐतिहासिक महोत्सवलाई सफल पार्न अहिलेदेखि नै प्रचार प्रसार तथा व्यवस्थापनको तयारीमा लागिएको महासचिव डा.दुलालले ज्ञानघरलाई बताए । कविता महोत्सवको मिति छिटै निर्धारित गर्ने समेत जानकारी गराइएको छ । बाल साहित्यकार शान्तदास मानन्धर प्रति श्रद्धाञ्जली प्रकट गर्दै बैठकले प्रलेस २९ अङ्क, रारा विशेषाङ्कको रूपमा प्रकाशित गर्ने निर्णय गरेको वक्तव्यमा उल्लेख छ ।