मध्य नाइजेरियामा सशस्त्र समूह द्वारा १६० जनाको सामूहिक हत्या

नाइजेरिया, १० पुस । मध्य नाइजेरियाका गाउँहरूमा भएको शृङ्खलाबद्ध आक्रमणमा सशस्त्र समूहहरूले कम्तीमा १६० जनाको ज्यान लिएको छ ।

धेरै वर्षदेखि धार्मिक र जातीय तनावको सामना गरिरहेको यस क्षेत्रमा सेनाले आइतबार साँझ सार्वजनिक गरेको प्रारम्भिक तथ्याङ्कको तुलनामा मृत्यु हुनेको सङ्ख्या उल्लेख्य रूपमा बढेको छ ।

बोकोसका स्थानीय सरकारका प्रमुख कासाहले जानकारी दिँदै भनेका छन् कि ‘शनिवारको युद्ध सोमबार बिहानसम्म जारी रहँदा कम्तीमा ११३ जनाको मृत्यु भएको पुष्टि भएको छ।’

कासाहका अनुसार उक्त सैन्य गिरोहलाई स्थानीय रूपमा ‘डाकूँ’ भनेर चिनिन्छ। ‘तिनीहरूले कम्तीमा २० विभिन्न समुदायहरूमाथि आक्रमण गरे र घरहरूमा आगो लगाए,’ उनले भने, ‘हामीले ३०० भन्दा बढी घाइते व्यक्तिहरू भेट्टायौँ, जसलाई बोकोस्, जोस र बर्किन लाडीका अस्पतालहरूमा लगिएको छ ।’

राज्य संसद् सदस्य डिक्सन चोलोमका अनुसार बार्किन लाडी क्षेत्रका धेरै गाउँहरूमा कम्तीमा ५० जनाको मृत्यु भएको छ । उनले आक्रमणको निन्दा गर्दै सुरक्षा निकायलाई तुरुन्त कारबाही गर्न आग्रह गरे। ‘हामी यी मृत्युका व्यापारीहरूको रणनीतिमा झुक्ने छैनौँ, हामी न्याय र दिगो शान्तिको खोजीमा एकजुट छौँ,’ चोलोमले भने।

बोक्कोस क्षेत्रमा सुरु भएको आक्रमण छिमेकी बार्किन लाडीसम्म फैलिएको थियो, जहाँ ३० जनाको मृत्यु भएको थियो । स्थानीय अध्यक्ष डन्जुमा डाकिलेका अनुसार यो क्रम शुक्रवार देखी सोमबार बिहानसम्म नै जारी रह्यो ।

आइतबार सो राज्यका गभर्नर कालेब मुटफवाङले हिंसाको निन्दा गर्दै यसलाई ‘बर्बर, क्रूर र अनुचित’ भन्दै टिप्पणी गरेका थिए, उनले सो हत्याकाण्डमा संलग्नहरूलाई कारबाही गर्नेसमेत जनाएका थिए ।

गभर्नरका प्रवक्ता ग्याङ बेरेले भने, ‘निर्दोष नागरिकहरू विरुद्ध जारी आक्रमणहरू रोक्न सरकारद्वारा सक्रिय कदम चालिनेछ।’

नाइजेरियाको अधिकांश मुस्लिम उत्तर र मुख्य रूपमा इसाई रहेको दक्षिणी बिचको विभाजन रेखामा रहेको क्षेत्रको स्रोतका अनुसार सोमबार दिउँसो पनि बन्दुकको आवाज सुनिएका थिए । मुशु गाउँका बासिन्दा मार्कस अमोरुडुले यसरी भयानक गोली चलाउँदा मानिसहरू सुतिरहेको अवस्थामा रहेको बताए।